Հոկտեմբերի 12-ին Հայաստանի հավաքականի մրցակիցն է Անդորրայի ընտրանին:
Ընդամենը 467.63 քառակուսի կմ զբաղեցնող և 84.082 բնակիչ ունեցող այս երկրի հավաքականի ֆուտբոլիստների գլխավոր խնդիրն արտագնա հանդիպումների ժամանակ աշխատանքի վայրից բացակայելու թույլտվություն ստանալն է: Անդորրայի հավաքականի ֆուտբոլիստները շատ են սիրում ֆուտբոլը, սակայն, այնուամենայնիվ, ապահովագրական ընկերություններում, բանկերում, խանութներում աշխատանքը և ուսումը համալսարաններում շատ ավելի կարևոր է նրանց համար: Ներկայացնում ենք 10 փաստ, որը պետք է իմանալ մեր մրցակից հավաքականի մասին, որոնցում կարելի է զուգահեռներ գտնել նաև հայկական ֆուտբոլի հետ.
1. Հայաստանի և Անդորրայի հավաքականները պատմության ընթացքում հանդիպել են վեց անգամ, որից չորսը եղել է տարբեր ընտրական մրցաշարերում, իսկ երկուսը եղել են ընկերական խաղեր: Հայաստանը հաղթել է հինգ խաղում, իսկ մեկ անգամ գրանցվել է ոչ-ոքի: Խփած և բաց թողած գոլերի հարաբերակցությունը 13-2 է:
2. Անդորրայի առաջնության բարձրագույն խմբում, ինչպես և Հայաստանում, կա ութ թիմ: Եվս ութ թիմ մասնակցում է երկրորդ դիվիզիոնի հանդիպումներին: Անդորրայի առաջնության հանդիպումների մուտքն ազատ է: Լավագույն թիմերի մասնակցությամբ հանդիպումների ժամանակ անշլագ է լինում՝ 150-200 հոգի: Բացի այդ գոյություն ունի «Անդորրա» ֆուտբոլային ակումբը, որը գրանցված է Իսպանիայի յոթերորդ դիվիզիոնում:
3. Անդորրայի հավաքականում հանդիպում են Չավի, Պույոլ և Մանոլո Խիմենես անուններով ֆուտբոլիստներ: Նրանք նաև շփվում են Չավիի և Պույոլի լեզվով, քանի որ Անդորրայում պետական լեզուն կատալոներենն է:
4. Անդորրայի հավաքականի մարզում է Խեսուս Լուիս Ալվարես դե Էուլա տե Գերգեն կամ պարզապես Կոլդոն: Նա դեռևս չի ավարտել իր ֆուտբոլիստի կարեիրան, սակայն հավաքականում այլևս ելույթ չի ունենում: 2003-ին Կոլդոն ճանաչվել է վերջին 50 տարիների Անդորրայի լավագույն ֆուտբոլիստ: 1991-ին նա Մադրիդի «Ատլետիկոյի» կազմում որպես երկրորդ դարպասապահ դարձել է Իսպանիայի գավաթակիր:
5. Անդորրայում կա միայն մեկ մրցավար, որը ՖԻՖԱ-ի արտոնագիր ունի՝ 38-ամյա Վիլյամոար Ռոզադոսը: Ի տարբերություն իր հայրենակից ֆուտբոլիստների, բանկի աշխատակիցը սպասարկել է Եվրոպա լիգայի որակավորման երրորդ փուլի հանդիպումներ (Անդորրայի ակումբներն այդքան հեռու չեն գնացել), ինչպես նաև Եվրոպայի մինչև 17 տարեկանների առաջնության հանդիպումներ:
6. Անդորրայում ընդհանրապես չկան ֆուտբոլային գործակալներ: Ֆուտբոլհիմնականում խաղում են ուսանողներն ու վետերանները, որոնք խաղում են Իսպանիայի ցածրագույն լիգաներում, այդ պատճառով միջնորդների կարիք չկա:
7. Ուժեղ հավաքականների դեմ հանդիպումներից առաջ ֆուտբոլիստները, առանց ամաչելու, ինքնագրեր են խնդրում:
8. Երկրում ընդամենը երկու լրատվամիջոց կա՝ Diari d’Andorra թերթը և մեկ հեռուստաընկերություն: Ինչպես և տեղի ֆուտբոլիստները, աշխատակիցներից շատերը արտահաստիքային հիմուքներով են աշխատում և լրագրությունից բացի ուրիշ զբաղմունք էլ ունեն:
9. Անդորրայի ֆուտբոլի ֆեդերացիան ընդամենը 20 աշխատակից ունի:
10. ՖԻՖԱ-ի դասակարգման ցուցակում Անդորրան 202-րդ տեղն է զբաղեցնում, իսկ թիմի լավագույն ցուցանիշը գրանցվել է 2005-ի դեկտեմբերին, երբ Անդորրան բարձրացել էր 125-րդ տեղ: 14 տարվա գոյության ընթացքում հավաքականն ընդամենը երեք հաղթանակ է տարել (Ալբանիայի, Բելառուսի և Մակեդոնիայի նկատմամբ):
Totalfootball.am
www.footballist.ucoz.com, ADMINISTRATOR