ԵՄԵՆ – ՀԱՅԱՍՏԱՆ ՀԱՆԴԻՊՈՒՄԸ ՉԻ ԿԱՅԱՆԱ: Հոկտեմբերի 23-ին Հայաստանի Բարձրագույն խմբի առաջնության «Ուլիս»-«Փյունիկ» հանդիպումից հետո տեղի ունեցած մամուլի ասուլիսի ժամանակ, «Փյունիկի» և Հայաստանի ազգային հավաքականի գլխավոր մարզիչ Վարդան Մինասյանը հայտարարել էր, որ նոյեմբերի 17-ին նախատեսված է ընկերական հանդիպում անցկացնել Եմենի ընտրանու հետ: Այսօր պարզ դարձավ որ այդ հանդիպումը չի կայանա: «Այս հանդիպմանը պետք է նախապատրաստվեին հիմնականում «Փյունիկի» ֆուտբոլիստները, ովքեր հոգնածություն են կուտակել երկար մրցաշրջան անցկացնելուց հետո, բացի այդ մի շարք ֆուտբոլիստներ վնասվածքներ ունեն: Թիմին չեն կարողանա միանալ նաև Ռոման Բերեզովսկին և Հենրիխ Մխիթարյանը, ուստի մեզ համար ավելի նպատակահարմար է խաղալ փետրվարին, որպեսզի լավագույնս նախապատրաստվենք Ռուսաստանի ընտրանու հետ կարևորագույն հանդիպմանը», – ՀՖՖ մամուլի քարտուղարության աշխատակցի հետ զրույցում իրավիճակը պարզաբանեց Հայաստանի ազգային հավաքականի գլխավոր մարզիչ Վարդան Մինասյանը: Հիշեցնենք, որ 2012թ. Եվրոպայի առաջնության Հայաստան-Ռուսաստան ընտրական հանդիպումը տեղի կունենա 2011թ. մարտի 26-ին: ՀՖՖ մամուլի քարտուղարություն
Totalfootball.am www.footballist.ucoz.com, ADMINISTRATOR
|