New England Sports Ventures (NESV) ընկերությունը հայտարարել է «Լիվերպուլ» ֆուտբոլային ակումբի հետ կապված գործարքի հաջող ավարտի մասին:
Ըստ համաձայնագրի պայմանների, NESV–ը «Լիվերպուլը» գնել է 300 միլիոն ֆունտով՝ ամբողջովին վճարելով ակումբի նախկին սեփականատերեր Թոմ Հիքսի և Ջորջ Ջիլլեթի օրոք առաջացած պարտքը: Արդյունքում այն գումարը, որը «Լիվերպուլն» ամեն տարի վճարում է որպես վարկային պարտավորություն, 25-30 միլիոն ֆունտից նվազեց մինչև 2-3 միլիոնի:
NESV ընկերության գրասենյակը գտնվում է ամերիկյան Մասաչուսեթս նահանգում: Ընկերությանն են պատկանում «Բոսթոն Ռեդ Սոքս» բեյսբոլի ակումբը, նրա «Ֆենուեյ Պարկ» մարզադաշտը, New England Sports Network հեռուստաընկերության 80 տոկոսը և NASCAR առաջնության մասնակից Roush Fenway Racing ընկերության 50 տոկոսը:
«NESV ընկերության անունից ցանկանում եմ հայտնել, թե որքան հպարտ եմ նրանով, որ մեզ բարձր պատիվ է ընձեռնվել դառնալ «Լիվերպուլի» սեփականատերերը: Մենք մեզ դիտարկում ենք ակումբը ղեկավարակողների կարգավիճակում: Մեր գլխավոր նպատակն է վերադարձնել ակումբի մեծությունը ֆուտբոլային խաղադաշտում և նրա սահմաններից դուրս: Մենք հաղթանակների փառավոր պատմություն ունենք, և այսօր ցանկանում ենք, որ «Լիվերպուլի» երկրպագուներն իմանան, որ մենք հենց դա ենք ցանկանում բերել այդ մեծ ակումբ»,- NESV–ի սեփականատեր Ջոն Հենրիի խոսքերը մեջբերում է ակումբի պաշտոնական կայքը:
Totalfootball.am
www.footballist.ucoz.com, ADMINISTRATOR
