Իտալիայի առաջնության 11-րդ տուրում «Միլանից» կրած պարտությունից հետո (1:3) «Պալերմոյի» նախագահ Մաուրիցիո Ձամպարինին հայտարարել է ակումբը վաճառելու ցանկության մասին: Սիցիլիացիների պաշտոնական կայքում հրապարակված հայտարարության մեջ Ձամպարինին ընդգծել է, որ արդեն իր օգնականներին հանձնարարել է հուսալի բանկ գտնել գործարքը վերահսկելու համար: Իր որոշումը Ձամպարինին բացատրել է Իտալիայի մրցավարական կորպուսի կողմից իր ակումբի նկատմամբ վերաբերմունքով:
Նրա կարծիքով, «Միլանի» դեմ խաղում մրցավարն անհիմն կերպով «Պալերմոյին» զրկել է երկու 11 մետրանոցից: Նա նաև նշել է, որ այլևս չի կարող դիմադրել այն համակարգին, որում իշխում են երեք-չորս ակումբների մարզական և տնտեսական հետաքրքրությունները: Բացի այդ 69-ամյա Ձամպարինին հույս է հայտնել, որ իրեն կփոխարինեն երիտասարդ և ամբիցիոզ սեփականատերեր, որոնք կշարունակեն իր գործը:
