Զիդան. Ինձ դուր է գալիս Ինյեստայի պահվածքը Ֆրանսիական ֆուտբոլի լեգենդ Զինեդին Զիդանը իր կանխատեսումներն է արել "Ոսկե գնդակին” հավակնող թեկնածուների վերաբերյալ և հայտարարել , որ իր ընտրությունը կանգ է առել Իսպանիայի հավաքականի ֆուտբոլիստների վրա: Անհատական պարգևների թիվն այս մրցաշրջանում կրճատվել է. France Football-ի "Ոսկե գնդակը” և ՖԻՖԱ-ի "Ադամանդե գնդակը” միավորվել են` պահպանելով առաջինի անվանումը: Փոփոխության են ենթարկվել նաև քվեարկության կանոնները: Այսուհետ բացի հավաքականների մարզիչներից և ավագներից` քվեարկության ժամանակ իրենց կարծիքն են հայտնելու նաև լրագրողները:
Ներկա պահին "Ոսկե գնդակին” հավակնող թեկնածուների ցուցակում ընդգրկված է 23 ֆուտբոլիստ, որոնցից 6 իսպանացի են: Դեկտեմբերի 6-ին թեկնածուների թիվը կրճատվելու, և մնալու է ընդամենը երեք անուն: Հաղթողը հայտնի կդառնա հունվարի 10-ին:
"Շատ ֆուտբոլիստներ կան, որոնք արժանի են նման բարձր պարգևի, - նշել է 1998թ. "Ոսկե գնդակի” մրցանակակիր Զինեդին Զիդանը, - սակայն ես նախապատվությունը կտայի իսպանացիներից մեկին, քանի որ հենց նրանք են հաղթել աշխարհի գավաթը և, առհասարակ, նրանք լավ են հանդես եկել ողջ տարվա ընթացքում: Իմ կարծիքով, իսպանացի ֆուտբոլիստը ամենից շատն է արժանի այդ "Ոսկե գնդակին”:
Աշխարհի 23 չեմպիոնների կազմում գլխավոր մրցանակին հավակնում են Իկեր Կասիլյասը, Խաբի Ալոնսոն, Չավին, Դավիդ Վիլյան, Կառլես Պույոլը և Անդրես Ինյեստան:
"Ինյեստայի” նման ֆուտբոլիստները ինձ հաճույք են պատճառում իրենց ցուցադրած խաղով: Ինձ դուր է գալիս նրա պահվաքը, քանի որ դաշտից դուրս նա շատ զսպված է, ինչը շատ լավ է”, - իր ընտրությունն է մեկնաբանել 1998թ. աշխարհի չեմպիոնը:
Armsport.am www.footballist.ucoz.com, ADMINISTRATOR
|