"Ատլետիկոյի” հարձակվող Սերխիո Ագուերոն Պրիմերայի շրջանակներում կիրակի օրը "Ռեալի” հետ կայանալիք հանդիպման նախօրեին հայտարարել է, որ "Ատլետիկոն” լավ թիմ ունի, որը կարող է պայքարել հաղթանակի համար: Բայց միևնույն ժամանակ հարձակվողը հիշել է, որ "Ատլետիկոն” արդեն 11 տարի չի կարողանում գերազանցել իր սկզբունքային հակառակորդին` "Ռեալին”: Բացի դրանից` Ագուերոն խոստովանել է, որ ուրախ է ակումբի հետ նոր պայմանագիր կնքելու վերաբերյալ: Հիշեցնենք, որ նոր պայմանագիրը նախատեսված է մինչ 2015թ. հունիսի 30-ը: "Մենք հիանալի թիմ ունենք, որը կարող է լավ արդյունքի հասնել, - Ագուերոյի խոսքերն է մեջբերում Marca-ն, - երբևիցե մենք կհաղթենք "Ռեալին”, և հուսով եմ, որ դա տեղի կունենա ընթացիկ տարում: Ինչ վերաբերվում է իմ պայմանագրին, ապա ես միշտ ասել եմ, որ երջանիկ եմ "Ատլետիկոյում” և չեմ պատրաստվում փոխել ակումբս, նույնիսկ ամենաանհաջող պահերին”:
|
